Na jane kyu!

Roz ki tarah subah whatsapp ki ghanti se neend khuli. Bin dekhe ehsas ho gaya ki mere un Kai sare groups ne good morning post kiya hoga. Maine dekha tak nahi. Chupchap phone liya aur nikal pada.

Pados ki us budhiya mausi ke paas gaya, jiske paas whatsapp to kya, mobile bhi nahi. Umr ke bojh tale dabi uski jhuki kamar, uski wo larazati aawaz me mujhe pyar ka ping sunai diya. Bahut der tak us se baat karta raha. ‘Apna khayal rakhna. ‘, maine jate hue kaha. Meri aankhein bhar aayi… jane kyu?

Aadat ke mutabiq haath apne aap facebook ki taraf badhe. Maine zabardasti apna face ghumaya. Pados ke chacha ki taraf badha. Unka ‘face ‘ pata nahi Kitne dino se nahi dekha tha. Wo diabetes aur doctors ke baare me pata nahi kab tak bolte rahe. Mere jaate jaate bole, ‘sambhal re! Kitni bhagdod karta hai! ‘  Anjane me mere haath unke pairo ki taraf badh gaye. Na jane kyu!

Din bhar whatsapp pe sardar jokes aate rahe. ‘Must Share’ posts se whatsapp overflow ho gaya. Par maine ek baar bhi screen ki taraf nahi dekha.

Subah sham, ghar se nikla kya… khana khaya kya… puchh puchh kar pareshan rahne wali meri maa ko khud se phone kiya. ‘Kya re? Kya hua? Sab theek to hai na?’ maa ki aawaz kuchh anhoni ke dar se kaanp gayi, tab ehsas hua ki aajkal bina wajah mai maa ko phone hi nahi karta! Dil me apne aap ko apradhi sa mahsoos karte hue mai bolta raha. Bolta hi raha, uska dil bhar jane tak. Aakhir me maa khud hi boli, ‘Rakhti hu. Pani bhar gaya hai. ‘

Pani ka to pata nahi, par mera dil zarur bhar aaya. Na jane kyu!

Sham ko jaldi ghar aa gaya. Whatsapp, facebook, twitter gunguna rahe the. Par mai apne pados ke bachho ke saath khelta raha. Khub hasa. Aajkal muskurahat sirf whatsapp ke sardar jokes padh ke hi aati hai. Khul ke hase hue to arsa ho gaya hai! Un bachho ka wo chahchahana achha laga. Musical whatsapp ki tune se kahi zyada. Na jane kyu!

Raat me beewi ne khana diya. Phone dikhai na de, itna dur rakh diya maine. Sabzi Bahut achhi bani thi. Khana kaisa bana hai, iske pahle kabhi dhyan nahi diya tha. Khate waqt bhi mere saath mere virtual friends hote the. Jee bhar ke khaya. Sirf ‘Like’ hi nahi, ‘Comment’ bhi kar diya. Beewi bade pyar se hasi. Is se pahle kab hasi thi? Yaad nahi!

Raat me dining table pe bachho ke saath baitha. Mobile, apni run-jhun karti ringtone ke saath meri nazro se kahi dur pada hua tha. Aaj facebook ki artificial philosophy nahi thi khate waqt. Bachho ki bakbak me mai kho sa gaya. Aaj mujhe ehsas hua un khoye hue lamho ka, jinhe meri online life ne mujhse chheen liya tha. Mere bachhe itne bade ho gaye hain! Mai khaosh sa unki baatein sunta raha. Muskarata raha. Bina samjhe. Bewakoofo ki tarah.

Bistar par let gaya. Phone takiye ke paas tha. Whatsapp ke pings ro ro kar mera dhyan kheech rahe the. Hairan the ki mai kaise bhool gaya unhe, ekaek! Aaj dinbhar me mera ek bhi post nahi. Ek bhi comment nahi. Aaj mujhe ek bhi likes nahi milne wale the. Na hi koi share karne wala tha. Aaj ke sare likes, sare comments, sare shares meri aankho me the. Unhe sahej kar rakhte hue maine apni aankhein band kar li.

Na jane Kitne dino baad us raat neend badi pyari aayi! Na jane kyu..!

Advertisements

2 responses to “Na jane kyu!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s